गुलाबी साडीतली ती कोमल छटा,
खांद्यावर रुळत्या त्या रेशमी बटा
हसण्यात तिच्या मधुर सुरांचे गंध,
आनंद सर्वत्र ती विखुरते मंद मंद
गालांतले हसू वाऱ्याची झुळूक
तिच्या चालण्यात लाजरी कळा
कमनीय बांधा नि मोरपंखी गळा
नेटकी नेसलेली ती रेशमी साडी
लाघवी डोळे अन बोलण्यात गोडी
जन हे थबकती बघ तुला पाहता
उदात्त निर्मल पावन तू महाश्वेता
- रुपेश तेलंग
०७-सप्टेंबर-२०२५
तुझ्या स्पर्शाला गुंतलेलं मन असं भारक्त व्हावी।
तुझ्या कुशीशी विसावणारी ओळख चिरंतक्त व्हावी॥
खुब मालुम आहे तुझ्या नजरेला साद घालणं।
तरी ती क्षणभर थांबणारी भावना स्पष्ट व्हावी॥
हरवलो मी जरी देते आधार, माझे सारे तम हरते।
जगाच्या मार्गी चालताना तुच माझी शक्त व्हावी॥
मला वाटते प्रेम मिळावे अगाध तुला या नशिबी।
माझ्याच छायेत हरवलेली प्रित ती व्यक्त व्हावी॥
मनीषा सारं पूर्ण होवो, मिळो तुला जे हवे ते।
प्रार्थना करतो देवचरणी, तू माझी फक्त व्हावी ॥
- रुपेश तेलंग
१२-जुलै-२०२५
शुभेच्छा तुला
आभाळ भरून
असो हर क्षण
आनंदाचा
मनिषा होऊ दे
पुर्ण सकलं
मिळू दे सगळं
मनसोक्त
प्रेम न् उल्हास
तो जवळ यावा
विकार तो जावा
दूरवर
आनंदी आनंद
दिवस हा नवा
गोजिरा व्हावा
जन्मदिन
- रुपेश तेलंग
लाल लाल
डौलदार माद्दक मनमोहक केश
केसांमघे माळलेले फुल लाल लाल
मंद मंद हवेतुन उडणारी लट
लटेमागे गोबरेसे गाल लाल लाल
नाकामध्ये नथ उगाचच मुरडत
नथीमध्ये चमकता खडा लाल लाल
मऊ ओठांआड लपलेले जणू मोती
हसुने फुलले मुखकमल लाल लाल
एव्हरी घालते ती पोशाख नानारंगी
सणावारी नेसलेला शालू लाल लाल
सुखाचा हा आपुला संसार सप्तरंगी
साजरा करूया हा सण लाल लाल
- रुपेश तेलंग
१३ फेब्रुवारी २०२५
मी खवळलेला समुद्र, तू शांत किनारा
तु नीटनेटकं घर मी अस्ताव्यस्त पसारा.
तु लयबद्ध पद्य मी रटाळ कथा
तु मनजोगी ईच्छा मी नाहक व्यथा
तु जुळलेला हिशोब मी सुटे पैसे
तु फस्ट क्लास फस्ट मी पास जैसे तैसे
मी साधी गरज तु जीवनावश्यक गोष्ट
मी अर्धवट वाक्ये तु संवाद सुस्पष्ट
तु फुललेली बाग मी कबड्डीचे मैदान
तु घनदाट वन मी ऊंचावरची मचान
मी लिंबुपाणी तु कोक
मी कचरता तु रोखठोक
- रुपेश तेलंग
१० - ०७ - २०२३
तापल्या ऊन्हात गार वारं थोडं थोडं ।
थकल्या जीवला ही आधार थोडं थोडं ॥
फिकीर करतो रातं रातं दिन दिन ।
जागत्या मनाने ही विसावं थोडं थोडं ॥
डोक्याने चालते जग रहाटी हि सारी ।
विचारावे मत हृदयाला थोडं थोडं ॥
जगी सर्वसुखी असा आहे तरी कोण ।
भलं तुझं व्हावं व्हावं माझं थोडं थोडं ॥
पुन्हा चाकरी ती रोजनिशी पुन्हा ती ।
बेत रविवारचा आखावा थोडं थोडं ॥
- रुपेश तेलंग
१५-०५-२०२३
रात्र होण्यासाठी
जरा अवकाश
झाले हे आकाश
श्यामरंग
अशी सांजवेळ
यमुनेचा घाट
अडवितो वाट
श्यामरंग
मटकी फोडाया
मारतोय खडे
गोपिकांसी छळे
श्यामरंग
गोपिका या सार्या
रागावती कान्हा
छेड काढी पुन्हा
श्यामरंग
हजर तो कृष्ण
राधेच्या भेटीला
खेळी रासलीला
श्यामरंग
यशोदेचा पुत्र
सखा राधिकेचा
पति रुख्मिणिचा
श्यामरंग
वासुदेव हरि
गोविंद केशव
मुरारी माधव
श्यामरंग
- रुपेश तेलंग
१४-०५-२०२३
रसिक हो ! सूर म्हणजे काय असतं..... अं?
काय असतं सूर...... ??
गायकाची भाषा असते सूर.......
स्वरांचा पेशा असतो सूर......
कवितेतला गाशा असतो सूर......
विनोदातील हशा असतो सूर......
गंजलेल्या नैराष्यावरील उपाय असतं......
रसिक हो ! सूर म्हणजे काय असतं..... अं?
- रुपेश तेलंग
२१ - ०१ - २०२३
छेडून पहावे पुन्हा तेच सुर
मनाशी वहावा भावनांचा पुर ॥
सुजाण सुशील सुमती म्हणुन
स्वतःशी जपावा स्वतःचा कसूर ॥
उणिवा ऊगाळत ऊगा जगावे
मना सलणारे व्यर्थ ते काहुर ॥
आवडते जे जे उराशी धरावे
जे मना विरुद्ध सरावे ते दुर ॥
- रुपेश तेलंग
१५-०१-२०२३
स्पर्शास स्पर्शाची
अंमळ कामना
स्पर्शाने स्पर्शावी
सहज भावना
स्पर्शाशी सांगवे
गुढ मनीचे
स्पर्शून जाणावे
गोप सुखाचे
स्पर्श करी दुर
उगाचा रुसवा
स्पर्शातून वाढे
सहृद ओलावा
जरा केशरी अन् पिवळी जराशी,
पुन्हा सांज यावी उंबरठ्या पाशी
सुखे सर्व सोयी मनोमीत मित्र,
जणू आप्त सारे उंबरठ्या पाशी
ऊजळोनी यावे भले दीप लक्ष,
असो पणती एक उंबरठ्या पाशी
ना ना फुलझाडे बहरावी फुलांनी,
छोटीशी तुळशी उंबरठ्या पाशी
डौल हा देखणा दावी वैभव घराचे,
सुरेख नक्काशी उंबरठ्या पाशी
सुख सारे मिळुदे सार्या मनिषा,
नांदुदे लक्ष्मी उंबरठ्या पाशी
आयु्रारोग्य पत प्रतिष्ठा समृद्धी,
सुखाचे दिवस हे उंबरठ्या पाशी
- रुपेश तेलंग
हळवी मवाळ लाघवी चपल
सुंदर सुजाण कुटुंब वत्सल
चतुर चपखल आणि चंचल
प्रसन्न प्रफुल्ल जैसे कमल
फुलांसवे तु मत्त ऊमल
जुई जाई मोगरा बकुल
तु नस्ता मन चलविचल
तुजविण हे जगणे विफल
रुपेश तेलंग
१०-०७-२०२१
॥ श्री रुपेश उवाच ॥
प्रसन्नवदना रसिका ललना मनरमणी
सुहासिनी सुखदात्री तु चैतन्यदाईनी
प्रगल्भ विचारयुक्तां स्फुट संवादिनी
सुमधुर मधाळ गोड पियुषरस वाणी
मुखचंद्र कोमल नाजुक तलमस्पर्शपाणि
सुगंधीत कुमारी तनु कस्तुरी सुवासिनी
सुंदर साज लेऊन गुंफली केशवेणी
दिसावा मीच या शांत शीतल लोचनी
छळवादी चंचल उडवित ओंजळ पाणी
सखी प्रियतमा अर्धांगिनी तु मनमोहिनी
- रुपेश तेलंग
२२-०८-२०१५
