तु

हळवी मवाळ लाघवी चपल

सुंदर सुजाण कुटुंब वत्सल 

चतुर चपखल आणि चंचल

प्रसन्न प्रफुल्ल जैसे कमल

फुलांसवे तु मत्त ऊमल

जुई जाई मोगरा बकुल 

तु नस्ता मन चलविचल 

तुजविण हे जगणे विफल

रुपेश तेलंग

१०-०७-२०२१

पुन्हा पुन्हा

धुंद ती पुन्हा पुन्हा
छंद ते पुन्हा पुन्हा
तुला मला जोडणारे बंध ते पुन्हा पुन्हा

बोल ते पुन्हा पुन्हा
शांत ही पुन्हा पुन्हा
तुझ्यासवे भाव माझे स्तब्धसे पुन्हा पुन्हा

ओढ ती पुन्हा पुन्हा
प्रेम ते पुन्हा पुन्हा
स्पर्शाने थरथरती स्पंदने पुन्हा पुन्हा

शब्द ते पुन्हा पुन्हा
काव्य ते पुन्हा पुन्हा
सुर ताल ह्रदयीचे श्राव्य हे पुन्हा पुन्हा

क्षण ते पुन्हा पुन्हा
वेळ ती पुन्हा पुन्हा
तुझ्या माझ्या स्वप्नांचा मेळ ही पुन्हा पुन्हा

खुश तु पुन्हा पुन्हा

खुश मी पुन्हा पुन्हा

तुझ्या जीवनात यावा दिन हा पुन्हा पुन्हा 

- रुपेश तेलंग
१० - ०७ - २०१८

मर्हाटी साज

नऊवारी
नेसली आज
मर्हाटी साज
देखणा बाज
तुझ्या दर्शनी ग...

सागरा
दिसतसे खोल
तिखट से बोल
नी डावा कौल
तुझ्या लोचनी ग...

नयनांचा
नशिला प्याला
हीच मधुशाला
म रोध कशाला
आज पिऊ दे ग...

वळून ही
पाहते अशी
सुरी सोनकशी
जिवाला जशी
पार छेदते ग...

अंदाज हा
दावी कुणास
नी लावे आस
खुद्द मदनास
उगा भुलवी ग...

- रुपेश तेलंग
२४-१२-२०१३

मनरमणी

॥ श्री रुपेश उवाच ॥

प्रसन्नवदना रसिका ललना मनरमणी
सुहासिनी सुखदात्री तु चैतन्यदाईनी

प्रगल्भ विचारयुक्तां स्फुट संवादिनी
सुमधुर मधाळ गोड पियुषरस वाणी

मुखचंद्र कोमल नाजुक तलमस्पर्शपाणि
सुगंधीत कुमारी तनु कस्तुरी सुवासिनी

सुंदर साज लेऊन गुंफली केशवेणी
दिसावा मीच या शांत शीतल लोचनी

छळवादी चंचल उडवित ओंजळ पाणी 
सखी प्रियतमा अर्धांगिनी तु मनमोहिनी

- रुपेश तेलंग
२२-०८-२०१५

प्रेम व्यवहार

रुसवा फुगवा हा तर निव्वळ शिष्ठाचार
चालू आहे हा प्रेम व्यवहार .

शोधून विषय नवे जुने
मोजून आपले उणे दुणे
मांडून बाजू डावी उजवी
नाही कुठली सबब वाजवी
कधी मागे कुरकुर कधी थेट तक्रार
चालू आहे हा प्रेम व्यवहार .

कधी छळ कधी संथ सतावणी
अबोला कधी, कधी नुसती बतावणी
कधी तीळासम विषयाचे पिंजणे
कधी उगा शब्दांनीच झुंजणे
वैद्य लागे जेव्हा विना विकार
चालू आहे हा प्रेम व्यवहार .

दुरी कमी अन् जवळीक ज्यादा
सुःख दुख्खी सोबतीचा वादा
अगाध प्रेमात तीटभर राग
भेटीची ओढ मिलनाचा स्वाद
सर्व शब्दांच्या शेवटी मुकार
चालू आहे हा प्रेम व्यवहार .

- रुपेश तेलंग
२७- ०६ -२०१५

मिलन

आभासी या मिलनास
साक्ष क्षितीजाची

अतृप्त आस अजुन
प्रेमी प्रेमीकेची

तु अनंत आभाळ नी
अगाध समुद्र मी

बरस माझ्यावर पुन्हा
थेंबाच्या रुपातुनी

- रुपेश तेलंग
२२-०५-२०१५

रुपलक्ष्मी

गोजिरे ते मुख
दर्शनी चैतन्य
सौंदर्य लावण्य
परी सम…!

सतेज सखोल
डोळे पाणिदार
तिखट किनार
भुवयांची…!

गोबरेसे गाल
ढळलेली बट
दातांमधे बोट
धरलेले…!

अल्लडपणाची
आकृती सजिव
तुझ्याशी हा जीव
जुळलेला…!

वलयधारीणी
तुच रुपलक्ष्मी
तुझिया सवे मी
दास तुझा…!

- रुपेश तेलंग
१३-०२-२०१४

मस्त पावसाची सर

रंग कमानी नभात
वायुसंगे फिरे गात
ओलावली फुल पात
तुझ्या अनोख्या रंगात

वर ढगांचा पसारा
त्यात झोंबणारा वारा
तरी ना पडे पाऊस
तुझ्या डोळ्यांचा दरारा

झाला पाऊस अधीर
पडे थळी सैरभैर
भिजवले सारे विश्व
नाही कुणाचीच गैर

झरझर झरझर
मस्त पावसाची सर
उगा शिऊनीया गेली
तुझ्या ओठांची किनार

- रुपेश तेलंग
२६-०९-२०१४

नको जाऊ सोडून...

अताशा कुठे पास आलीस माझ्या
नको जाऊ सोडून तान्ह्या जीवाला ।
बहाणी पुरे, कारणे ही पुरे ती
सहवास तुझा हा हवा जगण्याला ॥

बोलणे तुझे ते लळा लावीसी ग
शब्दांनी तुझ्या गुंफिली स्वरमाला ।
तुझे आसणे ही जणु मेजवानी
तुझ्या नसण्याने जणु रिक्त प्याला ॥

श्रृंखला तुटोनी माणिके गळावी
तुझ्या आसवांची ना किंमत तुला ।
खळीने त्या रोज प्राजक्त फुलतो
का कारणं नसे तुझ्या हसण्याला ॥

- रुपेश तेलंग
२४-०९-२०१४

चांदणे...

चांदणे... फुलते तुझ्या हासण्याने
मन हे... चळते तुझ्या असण्याने
आसवे... ढळती तुझ्या विरहाने
रुप हे... तुझे असे गोजिरवाणे

पाहणे...  भ्रमीत दाही दिशा
बोलणे... सुरेची मादक नशा
केश हे... जणू गर्द काळी निशा
चालणे... करी जीवाचीही दशा

पाकळ्या... दले ही या तुझ्या ओठांची
मोकळ्या... नभी छटा तुझ्या केसांची
सगळ्या... मना तुच राणी जीवाची
वेगळ्या...  अदा नेई ओळख जगाची

- रुपेश तेलंग
२३-०८-२०१४

तुझा कप...

जेव्हा दोन्ही हातांच्या ओंजळीत पकडशील
तेव्हा ती उब तुला माझी आठवण देईल
जवळ नेऊन ओठांचा स्पर्श करशील
तेव्हा माझ्या स्पर्शाची आठवण होईल
जेव्हा त्यातल घोटभर पिशील
तेव्हा तो घोट घोट गोडवा तुझ्या आयुष्यात विरेल
तळाशी न विरघळलेली साखर पाहशील
ते असेल संचित आपल्या प्रेमाच

- रुपेश तेलंग
१६-०८-२०१४

दव

दव थेंबांनी घ्यावा तुझा गोडवा
रुळावे खिळावे तुझ्या ओठूशी
वृक्षास तो विळखा जसा वेलीचा
मजला तुझी ती मिठी सैलशी

शब्द माझे

जरा शब्द माझे
मलाच सुचूदे
तुझ्या आठवांनी
सारेच भुलले

सरी पावसाच्या
भिजवता अंग
अन ओठी तुझ्या
हसू हे खुलले

कधी सप्तरंगी
वा मंदाकिनी ही
तुला पाहताना
नभ ही चळले

- रुपेश तेलंग
१३-०७-२०१४

सडा चांदण्याचा

ऊडत्या केसांवरी हा सडा चांदण्याचा
नच करु तु प्रयास उगा बांधण्याचा ॥

चंद्र ही लाजूनी पाठमोरा उभा
गुणगुणे गार वार्याची कानी सभा
केश मत्त हे जसा फाया फुलांचा
नच करू तु प्रयास उगा बांधण्याचा॥

निशा ही निराळी तराणेसे गाई
मंद तेजात सुंदर तुझी तरूणाई
जाणीले मी हा काळ मेळ साधण्याचा
नच करू तु प्रयास उगा बांधण्याचा ॥

- रुपेश तेलंग
२-४-२०१४

गजरा

पाहून  खिळता, चोरट्या नजरा
जेव्हा चंद्र माझा, माळतो गजरा

पसरून गंध, मोगरा फुलांचा
कसा श्वासाशी, खेळतो गजरा

न राहिला कुणी, सचेतनी, ध्यानी
कैफिने कैकांना, भाळतो गजरा

विसावतो स्वतः तिच्या केसांसवे
दुरून जीवाला जाळतो गजरा

- रुपेश तेलंग
०४-०५-२०१३

मोरपंखी

रुपेरी तराणे हवा मोरपंखी
तु लेउनी यावे छटा मोरपंखी

कपाळी अशा या रेखीव कमानी
नयनी नशिली कडा मोरपंखी

अलगद काया लहरी मौजेत
वाटे धरावे त्या करा मोरपंखी

गुंग मज करी स्वरांची स्वराली
कसा हा मिळावा गळा मोरपंखी

वळून बघावे बघून हसावे
घायाळ करते अदा मोरपंखी

- रुपेश तेलंग
०९-०५-२०१३

तुझ्याविना ...

डोळ्यापुढे माझ्या

काळोख दाटते

अंधुक वाटते 

तुझ्याविना ...

जीवनाशी आता 

करून बहाणी 

जगतोय राणी 

तुझ्याविना ...

पैसा न संपत्ती

मिळते अमाप 

मना कैसा लाभ 

तुझ्याविना ...

गोड लागणारी 

लागता अळणी 

मराठी ती गाणी 

तुझ्याविना ...

निशेच्या मोहात 

विझलेले गात्र 

कसली ती रात्र 

तुझ्याविना ...

सारेच तुझ्याशी

हरलेलो आहे

जिंकू मग काय 

तुझ्याविना ...

- रुपेश तेलंग 

7 -5 -2012

उगाचच...

विरहाचे दुःख
बाजूला सारत
लागलो परत
जगायला

हसरा भासतो
बाहेर जगाला
आनंद मनाला
क्वचितच

एकदा परत
मऊ मखमली
पदराची सावली
मिळेल का?

नेली हिरावून
जीवनाची गती
शोकांत ही किती
करायचे

आठवता तिला
लवते पापणी  
डोळ्यातून पाणी
टचकन

सांगतो रुपेश
प्रेम नका करू
जितेपणी मरू
उगाचच...


- रुपेश तेलंग
१६ - ३ - २०१२
  

तुझ्या फोटो कडे बघून...

मन माझे बावरलेले
लक्ष नाही ठिकाणावर
कोठे नाही दुसरी कडे
फक्त तुझ्या ओठांवर||

नजर गेली हरून
समोर काहीच नसते
गालावरील खळी तुझ्या
सलतच मला दिसते ||

कान झाले बधीर
ऐकू काही येईना
तुझी मंजुळ हाक
डोक्यातून जाईना ||

झोप गेली उडून
फक्त तुलाच पाहतो
तुझ नाव लिहित
नुसता पडून राहतो ||

जीवन झाल एकाकी
गेलीस तू निघून
असाच जगत आहे
तुझ्या फोटो कडे बघून ||

मूळ कवी - अरुण झिंगुर्डे

बघायचंय मला तुला — माझ्यावर प्रेम करताना !!!!

माझ्या गालावरची खळी तुझ्या ओठाआड़ दडताना
तुझ्याच प्रेमाच्या मोहात माझे प्रेम पडताना

माझा गेलेला तोल तू हलुवारपणे सावरताना
मनातला गोंधळ हलक्या स्पर्शाने आवरताना

तुझ्या बाहुपाशांत मी सुख-स्वप्नं रंगवताना
मावळत्या सुर्यालाही आशेचे किरण पांगवताना

दुरवर उभा राहून तू माझ्याकडे पाहून हसताना
मृगजळ असुनही सारं काही सत्यात भासताना

पोटातलं दुःख लपवुन ओठात हसू ठेवून वागताना
तरीही माझ्या सुखासाठी देवाकडे मागणं मागताना

पावसाच्या सरींच्या प्रेमात पडलेल्या चातका सारखं आनंदात न्हाताना
माझे दुखा:श्रुही तुझ्या आनंदात गातांना

माझी सारी स्वप्नं तुझ्याबरोबर पूर्ण झालेली पहातांना
सारी सुखं आपल्या समोर हात जोडून उभी राहतांना

- अज्ञात