मिलन

आभासी या मिलनास
साक्ष क्षितीजाची

अतृप्त आस अजुन
प्रेमी प्रेमीकेची

तु अनंत आभाळ नी
अगाध समुद्र मी

बरस माझ्यावर पुन्हा
थेंबाच्या रुपातुनी

- रुपेश तेलंग
२२-०५-२०१५

मस्त पावसाची सर

रंग कमानी नभात
वायुसंगे फिरे गात
ओलावली फुल पात
तुझ्या अनोख्या रंगात

वर ढगांचा पसारा
त्यात झोंबणारा वारा
तरी ना पडे पाऊस
तुझ्या डोळ्यांचा दरारा

झाला पाऊस अधीर
पडे थळी सैरभैर
भिजवले सारे विश्व
नाही कुणाचीच गैर

झरझर झरझर
मस्त पावसाची सर
उगा शिऊनीया गेली
तुझ्या ओठांची किनार

- रुपेश तेलंग
२६-०९-२०१४

दव

दव थेंबांनी घ्यावा तुझा गोडवा
रुळावे खिळावे तुझ्या ओठूशी
वृक्षास तो विळखा जसा वेलीचा
मजला तुझी ती मिठी सैलशी

शब्द माझे

जरा शब्द माझे
मलाच सुचूदे
तुझ्या आठवांनी
सारेच भुलले

सरी पावसाच्या
भिजवता अंग
अन ओठी तुझ्या
हसू हे खुलले

कधी सप्तरंगी
वा मंदाकिनी ही
तुला पाहताना
नभ ही चळले

- रुपेश तेलंग
१३-०७-२०१४

वर्षाऋतू

डोंगराची हवा
लागे गार गार
थेंबांचा हा वार
सुखदसा...

झाडे पाने फुले
हालती डोलती
मौजेत झुलती
वार्यासंगे....

शर्यती पळती
ढगांची ती रांग
दोनच फर्लांग
दुरवरी...

ओढे नद्या नाले
खळाळून वाहे
बरसत आहे
वर्षाराणी....

खुलवी खुशाल
पिसारा हा मोर
श्रावणा समोर
पाहूनिया....

- रूपेश तेलंग
१९-०६-२०१३